الشوق علينا ازداد والعين مساهرة
لي سوح ابي إبراهيم القوم مسافرة
*************************
احفظنا يارحمن دنيا وأخرى
ورضاك علينا دوام لا نبقى عبرة
منهج السادات لا ليهو نبري
نترك السيئات نهجرها هجرة
************************
كالسادة القايمين بالليل ساهرة
بي حب نبيها الزين هايمة وساكرة
نك زيهم بالحب البابنا عامرة
وخمر الغرام ياقوم لي عقولنا خامرة
***********************
بمديح نبيك يا مولاي اجعل شغلنا
نغني به ونكفي شر قال وقلنا
نحي الليالي به ونضرب طبلنا
كالعشاق به نسعد وان جالو جلنا
*********************
بثني الامداح وبسبك نظامي
فوق شافع الأهوال طه الختامي
كاشف همومي يمين ومزيل سقامي
بي مدحه الميمون يعلو مقامي
* ** ***************
يوم مولدو الرحمات عمت أرضنا
فرحة به العليا والفي أرضنا
جانا الهنا والنور ستار عَرِضنا
زال الشرور كلا بيهو عَرَضنا
*******************
مثلك قسم بالله ما كان فيها
و الأخرى تلك وما تحتويها
يا معدن الأسرار الكامنة فيها
لولاك يالمختار ايش تاني فيها
*****************
كان ربيع القامة وعينو كاحلة
ابلج اسيل الخد وبطنو ناحلة
مفلج الاسنان في صوتو صحلة
كالمسك ريحو يمين بل هو احلا
****************
من ايو يامشتاق لي ليمو حن
العود والايكات حين يدعهن
جاتوا بلا أقدام ليهو سعن
قالن حباب أحمد له سلمن
****************
صحبو الفحول يازيد ركبو العواتي
شايلين رماح ماضيات بل قاطعاتي
للكفر النجوس ساموا ساووا الفواتي
بيهم شموس الدين اضحت شارقاتي
****************
من طيبة المختار لاحت بروقا
قلب العشوق كوّت زادته شوقا
لي تلك الديار يارب نحدها نوقا
نوصل رياض سوحو ونبلو شوقا
*****************
صلواتي كالامطار وافرة وهميلة
توصل ضريح الخير كاب الهميلة
حافظ ابن الشيخ غالباهو حيلة
فوقك حمولو جميع ختاها شيلا
*****************
حافظ الشيخ
الاثنين 10/8/2020