الشوق علينا ازداد وقليبنا عاركو

الشوق علينا ازداد وقليبنا عاركو
لي سوح ابي إبراهيم نحديلو تاركو
*****************
انفسنا يامولاي نقيها تزكو
من الهوي وابليس قط لا تشاركو
في ظلمة الليل لألوب تفركو
سوح نبيك تعناه تعبالو كاركو
****************
وصلنا يا مولاي من غير سيركو
واملانا بالأسرار واوكيهو تنكو
خمر الغرام نرشف ماهو تبكو
يسكر العشاق كا الثكلي يبكو
**************
ثاني الأوزان بجيب لي سبكو
فوق طيب الأخلاق الحالي سبكو
يوم الخلوق حيري في الحشر دبكو
قالو الرسل ياقوم لي طه أشكو
****************
ميلادو فاح الطيب والمسك عابق
عم السرور والنور والخير دافق
دين الشرك والزيق هادم ودابق
بيهو في الجنات اعرجنا سابق
****************
بشرانا يا أحباب بي أحمد نبينا
خير الأمم بيهو صرنا وبقينا
حاشاهو أن ينسي أو يرضى فينا
قسما يمين بيهو في الجنات رقينا
***************
  من معجزاتو الضب وأيضا غزالة
وبي مسه الاسقام قطعا ازالا
بي تفلو رد العين والمر زلالا
من اصبعيه اليم فاض وسالا
***************
لي ليمو حن العود والحيه لاسعة
الفاق ابوهو ونوح والآياتو تسعة
والايك غير أقدام جاءت لو تسعى
يارب متين ليهو نحدا ونسعي
**************
هذا الأمين ياقوم هذا محمد
هذا الضمين لينا مولانا نحمد
صاحب العطا والجودو سرمد
بي كفه النيران تطفي وتخمد
****************
هو معدن الاسرار هو سر وجودنا
لولاهو  ما كنا وكان وجودنا
هو رحمة من رحمات مولانا ودودنا
سيد ابي وامي سيد جدودنا
***************
الداني الدني لي مولاهو سيدو
كونو حبيب الله وهو بريدو
قال ليهو يا أحمد انت وحيدو
عندي في الزلفي ما ليك نديدو
*****************
بعينو شاف مولاه نال الشفاعة
حاز الفخار والفضل للخير شاع
الكان في اليم حين الرضاعة
لولاهو بي امو ماكان اجتماعا
*****************
أصحابه الأحرار للكفر دكو
حصونم ولي ازواجهم ابكو
هانوا الطغاة ليهم صدو وسكو
كادو اللعين في قليبو شكو
**************
برقا من تجاه سيدي لاح واومض
من عيني شال النوم وحماها تغمض
صاب القليب ليهو شوي وارمض
كالحنظل شرابو صار منه تمضمض
***************
صلواتي للمختار ماحن عاشق
لي ليمو كالجزع لي عرفو ناشق
حافظ بن الشيخ قلبو كخاشق(خاشقجي)
ناحر فؤادو الشوق بي سهمو راشق
*******************
حافظ الشيخ البشير محمد المبشر المكاشفي
الاثنين 14/12/202‪0