لي في المدينة رسول
كامل بصلي عليهو
خاتم ومثلو مافي
قلبي خاضع ليهو
*********************
مولاي ي كريم عبدك ضعيف قويهو
نورو بالتقي ثوب العفاف اكسيهو
بي طرق الكرام سيرا حثيث مشيهو
يوصل لي مقام الجد ثم ابيهو
**************************
ثن بالرسول شافع الانام دخريهو
ذوالخلق الفضيل كل الشرف حاويهو
باذل لي النفس عمرو العزيز فانيهو
صادق الوعد ماخاب من راجيهو
**************************
خير الانام الربنا معليهو
حبو مالك روحي قلبي هايم بيهو
فاق بدر التمام نور الاله كاسيهو
غاية رجاي انا قصدي اوصل ليهو
*****************************
ان جاهو المحب في روضتو بيدنيهو
والفوز العظيم لعشوقو بشر بيهو
في المساء والصباح ياخوانا صلو عليهو
كل من صل عليه مولانا صلي عليهو
******************************
الشافع المشفع من رب العباد باريهو
يوم اسري وعرج علت الحجب نعليهو
شاف ربو الكريم بالقلب ثم عنيهو
قالو سال ماتشأ كل شيء يعطيهو
***************************
كل من عشقو قال انا بالنفس افديهو
خير العالمين سيد موسي ثم ابيهو
فايق في الجمال اثلاث خديهو
ازج وادعج كاحلات عينيهو
***************************
خالقو معظمو علي فطرتو مربيهو
سيد المرسلين في الخلق مافي شبيهو
خلقو الحسين عرفو المسك خافيهو
من حسنو البدر يخجل يغطي وشيهو
************************
من اي القمر خر وقسم نصفيهو
وان نادي الشجر حالا سريع ياتيهو
الحجر الصميم سلم والجذع حن اليهو
وان مشي في الرمال مابان اثر قدميهو
*******************************
الصلاة والسلام من الله ليك يانبيهو
حويتك عوض وابن عبدالحليم تهديهو
حافظ ياسيدي الرسول اصلو الذنب ماليهو
في اليوم الصعيب دايرك تشفع ليهو
بقلم حافظ الشيخ
الاثنين 9/1/2017